Маҳалла “драйвери” – чорвачилик ва деҳқончилик. Тўқсон фоиз аҳоли хонадонларида чорва моллари бқоилади. Ҳар бирида 10-15 бошдан товуқ бор. Гўшт, тухум ва сут маҳсулотлари ўзларидан. Рўзғоридан ортганини сотиб, даромад қилади.
Айрим хонадон эгалари 30-50 бошдан буқа боқиб, аҳолига гўшт етказиб беради. 15-20 тадан соғин сигир боқаётганлар бор. Келгусида барча маҳсулотлар маҳалланинг ўзида бўлгани учун сут ва гўшт маҳсулотларини қайта ишлайдиган корхона ташкил этиш режалаштирилмоқда.
Қишлоқ хўжалиги маҳсулотларидан шоли, ғалла, пахта экилади. Аҳоли томорқаларида картошка, пиёз, сабзи, помидор, бодринг, қовун-тарвуз каби полиз маҳсулотлари етиштирилади. Эллик фоиз хонадон эгалари ўз томорқаларида ғалладан кейин шоли экади. Бу ҳам қўшимча даромад келтирмоқда.
Аҳоли ҳудудда инфратузилмани яхшилаш учун “Ташаббусли бюджет” лойиҳасида фаол қатнашмоқда. Шу вақтга қадар уч марта лойиҳа ғолибига айланди. 1700 метр ички йўл асфальтланди. Эндиликда 2200 метр қисми асфальтланади. Битта трансформатор, 20 та бетон устун қўйилди. Яна битта трансформатор ўрнатилади. Қувонарлиси, барча кўчага ичимлик сув қувурлари ётқизилмоқда.
Азамат РАЖАБОВ,
Боғот туманидаги “Оқолтин” маҳалласи раиси