Туман марказидан 35-40 километр узоқликда жойлашган маҳаллада 2 656 нафар аҳоли яшайди. Шу кунга қадар қишлоқ аҳли бир иш билан мурожаат қиладиган маҳалла идораси йўқ эди. Дастур доирасида замон талабларига жавоб берадиган, кўркам бино қуриб берилди. Бундан ташқари, озиқ-овқат ва бошқа маҳсулотлар сотишга мўлжалланган савдо расталари қад ростлади. Айниқса, маҳаллада жойлашган касб-ҳунар мактаби биноси негизида бадиий адабиётларга бой кутубхонанинг фаолият бошлагани тоғайтемирлик ёшларни қувонтирди.
Таъкидлаш лозимки, дастур доирасида “Деҳқонобод калий заводи” АЖ ҳомийлик маблағлари ҳисобидан аҳолининг ичимлик сув таъминотини яхшилаш мақсадида 150 метр куб ичимлик сув сақлаш ҳовузи қурилгани маҳалла аҳолисини хушнуд қилди. Боиси шу кунга қадар қишлоқ аҳли учун ичимлик сув таъминоти муаммолигича қолаётган эди. Қолаверса, қишда лой, ёзда чанг бўлиб ётадиган кўчаларнинг 20 километр қисмига шағал тўкилди. Электр таъминотини яхшилаш мақсадида 157 та темир-бетон устун, 2 та трансформатор ўрнатиш ва 8,4 километр тармоқ тортиш ишлари бажарилди. Шунингдек, “Ҳазрати Шер Худо” қабристонида йўлаклар қурилиб, кириш қисмига зинапоялар қилинди. Ёшларнинг бўш вақтини мазмунли ўтказиш мақсадида спорт майдончалари, “Workaut” қурилди.

Маҳалламизда авваллари ҳар бир хонадонда камида 5-6 тупдан дарахт бўларди. Ўртада сувсизлик оқибатида уларнинг кўпи қуриб қолди. “Яшил макон” лойиҳаси доирасида яна дарахтзорлар барпо этишга киришдик. Тўғри, лойиҳа биринчи бошланган пайтда жуда кўп хатоликларга йўл қўйдик, буни тан олиш керак. Чунки айни шу ҳудудга мос дарахт экмадик, сув тизимини ўрганмадик, тупроқни ўрганмадик, фақат сонга юрдик. Бу йил суғориш тизими мавжуд бўлган ерларга ва шароитга мос дарахтлар экдик. Ҳар бир кўчатнинг эгасини белгиладик, сув тизими ўрнатилмаган ерга кўчат экилмади. Кўчатлар назорат қилиниши учун электрон платформага киритилди. Ўйлайманки, яқин 5-6 йилда яна аввалгидек хонадонлар олдида дарахтзорлар пайдо бўлади.

Яна бир гап: “Рақамли маҳалла” тизимини жорий этишни тезлаштириш керак. Бу орқали маҳаллаларнинг ҳудуди, майдони, инфратузилмаси, чегараси акс этган харитаси, хонадонларнинг жойлашуви, рақамлари ва кўча номларининг ягона базасини юритиш имкони пайдо бўлади. Зеро, олис ҳудудлардаги айрим маҳаллаларда ҳали-ҳануз хонадон рақами, кўча номи мавжуд эмас. Кимнидир излаб борсангиз, “Яшил томли дўкондан кейинги уй…”, “Йўлнинг охиридан чапга, озроқ юриб, яна ўнгга буриласиз…” деган мужмал жавобларни эшитасиз. Шу боис маҳаллани рақамлаштиришни тезлаштириш керак.
Бобомурод ХУРРАМОВ,
Деҳқонобод туманидаги
“Тоғайтемир” маҳалласи раиси.