— Биламизки, ташкилот ва корхонада ходим учун ижтимоий таътиллар белгиланган. Бу таътил асосида дам олишга чиққанлар ойлик маоши сақланиб қоладими? Аввало шу ҳақда маълумот берсангиз. Шунингдек, ходим ўз ҳисобидан олинадиган таътил ижтимоий таътил ҳисобланадими?
Умидила БАҲОДИРОВ,
Янги наманган туманидаги “Ахсикент” маҳалласи раиси.
Лазизбек ҚАРШИЕВ,
Камбағалликни қисқартириш ва бандлик вазирлиги бошқарма бошлиғи:
— Меҳнат кодексининг 236-моддасида ходимларга оналик, болаларни парваришлаш, таълим олиш учун қулай шарт-шароитлар яратиш мақсадида, шунингдек бошқа ижтимоий мақсадларда бериладиган таътиллар эканлиги белгиланган.
Қонунчиликда бир қатор ижтимоий таътиллар мавжуд. Меҳнат кодексининг 237-моддасига мувофиқ ходим қуйидаги ижтимоий таътилларни олиш ҳуқуқидан фойдаланади:
ҳомиладорлик ва туғиш таътиллари;
бола парваришлаш таътили;
ўқув таътили;
ижодий таътиллар.
Ходим ўқув таътилида, ёки ижодий таътилда бўлган вақтида унинг ўртача иш ҳақи сақланиб қолади. Бундан олий таълим ташкилотларига ўқишга кирганда бериладиган иш ҳақи сақланмайдиган таътил мустасно.
Ўз ҳисобилан олинадиган таътил ижтимоий таътил тоифасига кирмайди.