— Маҳалламизда ер майдонига кадастр ҳужжатисиз якка тартибда уй-жой қурган фуқаролар бор. Уларда шу ерни ажратиш бўйича ҳоким қарори йўқ. Мана шу фуқаролар қандай қилиб эгалик ҳуқуқини белгилаши мумкин?
Илҳомжон УСМОНОВ,
Давлатобод туманидаги
“Ўрта ровустон” маҳалласи раиси.
Аброрбек ЭЪЗОЗХОНОВ,
“Мадад” НТТ ҳуқуқшуноси:
— Ер майдонига тегишли рухсатнома олмасдан туриб қурилиш қилиш қонунчилик бўйича ўзбошимчалик билан иморат қуриш хисобланилади. Ўзбекистон Республикаси Фуқаролик кодексининг 212-моддасининг 4-қисмида “Иморат қурилган ер участкасининг мулкдори бўлган, унга умрбод мерос сифатида эгалик қилаётган, доимий эгалик қилаётган ва фойдаланаётган шахснинг ўзбошимчалик билан қурилган иморатга нисбатан мулк ҳуқуқи суд томонидан эътироф этилиши мумкин” деб белгилаб қўйилган.
Шу моддага асосан, мазкур ўзбошимчалик билан қурилган уй-жойга эгалик ҳуқуқини олиш учун мазкур судга даъво ариза билан мурожаат қилиш лозим бўлади. Суднинг қарорга ассоан эгалик ҳуқуқи олингандан сўнг уйни кадастр ҳужжатларини расмийлаштириш мумкин бўлади.
Аммо бошқа бир ҳолатда фуқаролар қурган уй-жойларига 15 йил мудддат ўтган бўлса, мулк ҳуқуқи олиши мумкин бўлади. Яъни фуқаролик кодексининг 187-моддасига кўра, эгаси бўлмаган, кадастр ҳужжати бор уйда 15 йил яшаса, ўз номига расмийлаштириши мумкин. Бунда умумий даъво муддати (3 йил)ни ўтказиб, жами 18 йил яшаши ҳам талаб этилади.