— Маҳаллада истиқомат қилувчи турмушдан ажрашган аёл ота ҳовлисида яшайди. Уй-жойга муҳтож. Бу фуқаро “Аёллар дафтари”га киритиладими? Агар рўйхатга киритилса, уни давлат ҳисобидан уй-жой билан таъминланадими?
Азизжон БОЙҚЎЗИЕВ,
Данғара туманидаги “Қум-қияли” маҳалласи раиси.
Раҳима МИРҲОЛИҚОВА,
Оила ва хотин-қизлар қўмитаси бошқарма бошлиғи:
— Вазирлар Маҳкамасининг “Хотин-қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги қарори билан тасдиқланган низомга асосан, уй-жойга мухтож яъни, нотурар жойларда истиқомат қилаётган, доимий яшаш учун турар жойи бўлмаган, бир хонадонда (кичик ҳовлида) уч ва ундан ортиқ оила яшаётган (уй-жой майдони белгиланган ижтимоий меъёрдан кам бўлган), бироқ ўзининг ёки биргаликда яшовчи оила аъзоларининг номида турар жой мавжуд бўлмаган, хусусий уй-жой фондида ижара ҳуқуқи асосида истиқомат қилаётган эҳтиёжманд хотин-қизлар “Аёллар дафтари”га киритилиши мумкинлиги кўрсатилган.
«Ижтимоий ҳимоя ягона реестри» ахборот тизимида кам таъминланган оила сифатида рўйхатга олинган оилалардаги хотин-қизлар «Аёллар дафтари»нинг фақат «ижтимоий ҳимояга муҳтож ишсиз хотин-қизлар», «тадбиркорлик қилиш истагида бўлган эҳтиёжманд хотин-қизлар» ва «уй-жойга муҳтож эҳтиёжманд хотин-қизлар» тоифаларига киритилиши мумкин.
Шунингдек, юқоридаги қарор асосида тасдиқланган «Аёллар дафтари»ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш тартиби тўғрисида”ги низомга кўра, уй-жойга муҳтож эҳтиёжманд хотин-қизлар учун ижара компенсациясини тўлаш, ижтимоий уйларга жойлаштириш, уй-жой билан таъминлаш, зарур ҳолларда, сектор раҳбари хулосаси асосида бир марталик моддий ёрдам бериш кўзда тутилган.
Эътибор берган бўлсангиз, уй-жой билан таъминлашда имтиёзли кредит асосида уй сотиб олиш, ижтимоий уйларага 5 йил муддат ижара асосида яшаш учун жойлаштириш назарда тутиляпти. Яъни, бепул давлат ҳисобидан уй-жой берилмайди. Кредит асосида уй-жой олувчилар даромад манбаига эга бўлиши керак. Уларнинг 1 йиллик даромади кўриб чиқилади. Банк кредитларини олишда талабгор Давлат хизматлари марказига ариза билан мурожаат қилади. Бунда ҳеч қандай инсон омили иштирок этмайди.