Маҳалланинг асосий “драйвери” – қишлоқ хўжалиги маҳсулотлари ва чорвачилик. Аҳолининг саксон фоизи хонадонларида чорва моллар боқишади. Гўшт ва сут маҳсулотлари ўзларидан, рўзғордан ортганини бозорга чиқаришади.
Олтмиш фоиз аҳоли картошкачилик билан шуғулланади. Бунда Самарқанд қишлоғи аҳолиси етакчи, деярли барчаси картошка етиштиради. 120 та хўжалик 50 сотихдан 30 йилга ер олиб, деҳқончилик қилмоқда. Улар, асосан, картошка ва қизил ловия экади. Биргина 12 сотихли томорқасига экилган картошкадан 12 миллион сўмгача даромад олмоқда. Жаҳонда қизил ловияга талаб юқори бўлгани учун даромад яхши.
Ўтган йил барча шароитларга эга янги маҳалла идораси қурилди. 120 ўринли давлат боғчаси фойдаланишга топширилди. Ҳудудда 4 та мактаб, 5 та хусусий уй боғчаси, қишлоқ врачлик пункти, маданият маркази фаолият юритмоқда. Маданият марказида турли тадбирлар уюштирилиб, ёшлар мавжуд тўгаракларда бўш вақтини мазмунли ўтказмоқда.
Маҳалла туман марказидан 25 километр олисда жойлашган. Шу сабаб жамоат транспорти қатнови муаммо. Машинаси йўқлар 7 километр пиёда юриб, кейин катта автомобиль йўлдан жамоат транспортларига чиқади. Шунингдек, 28 километр ички йўллар асфальтланиши, 3 та трансформатор, 260 та эски симёғочлар бетон устунларга алмаштирилиши керак. 12 километр ичимлик сув тармоқлар тортилиши зарур. Ҳудудда битта текстиль корхонаси қурилса, кўплаб ишсиз аҳоли ишли бўларди. Бунинг учун хомашё ҳам, жой ҳам, ишчи кучи ҳғам етарли.
Ғанишер ИБРОҲИМОВ,
Оққўрғон туманидаги “Зарбдор” маҳалласи раиси.