— Маҳалламиздаги кўп қаватли уйларда яшовчи бир гуруҳ фуқаролар уй олдидаги бўш ерга ўзаро келишган ҳолда автомашиналари учун сақлаш жойи қуришган. Айтингчи, улар мулкдор сифатида ўзлари мустақил шундай йўл тутишса бўладими? Ёки бунинг учун ҳокимликдан рухсат олиш керакми?
Эверест ЖЎРАҚУЛОВ,
Фориш туманидаги
“Боғдон” маҳалласи раиси.
Аброрбек ЭЪЗОЗХОНОВ,
“Мадад” ННТ ҳуқуқшуноси:
— Уй-жой кодексининг 124-моддасида бу саволга батафсил жавоб берилган. Унга кўра, кўп квартирали уйда яшовчиларга тегишли бўлган мулклар санаб ўтилган. Жумладан, кўп квартирали уйдаги турар жойлар ва яшаш учун мўлжалланмаган жойлар ҳам мулк ҳуқуқи асосида тегишли бўлади. Аммо кўп квартирали уйдаги турар жой ва яшаш учун мўлжалланмаган жой мулкдорининг умумий мол-мулкдаги улуши сифатида асл ҳолида ажратиб берилиши мумкин эмас.
Кўп квартирали уйдаги турар жойлар ва яшаш учун мўлжалланмаган жойлар мулкдорларининг улушли мулкида турган умумий мол-мулкнинг айрим қисмлари қонунчиликка мувофиқ умумий улушли мулкнинг барча иштирокчилари томонидан бир овоздан қабул қилинган қарор асосида бошқа шахсларга берилиши мумкин.
Бундан ташқари, мазкур кодекснинг 16-1-моддасида кўп квартирали уйдаги яшаш учун мўлжалланмаган жой мулкдори маҳаллий давлат ҳокимияти органларидан тегишли рухсатнома олмасдан ўзига қарашли жойни ўзбошимчалик билан қайта қурган ёки ўзгартирган тақдирда, қонунчиликда белгиланган тартибда жавобгар бўлади ҳамда бу жойни ўз ҳисобидан аввалги ҳолатига келтириши шарт, деб кўрсатиб қўйилган.
Шунга асосан, кўп қаватли уйларни олдидаги автотураргоҳларни қуриш учун шу ерда яшовчиларнинг розилиги билан туман ҳокимлигининг арихитектура ва қурилиш бўлимига мурожаат қилиб рухсатнома олиш лозим бўлади.