— Биламизики, қонунчиликда болаларга тўланадиган алимент миқдори, тартибидан ташқари она таъминоти учун тўланадиган алимент ҳам назарда тутилган. Қонунчиликда она учун энг кам алимент миқдори қанча бўлиши керак?
Улуғбек АТАКИШИЕВ,
Гулистон туманидаги “Бирлашган” маҳалласи раиси.
Аброрбек ЭЪЗОЗХОНОВ,
“Мадад” ННТ бош мутахассиси:
— Оила кодексининг 118-моддасига кўра, никоҳдан ажралганидан кейин собиқ эр (хотин)нинг таъминот олиш ҳуқуқи белгиланган. Яъни, собиқ хотин ҳомиладорлик даврида ва ўртада бола туғилган кундан бошлаб уч йил давомида собиқ турмуш ўртоғидан ўзининг таъминоти учун алимент олиши мумкин. Мазкур кодекснинг 119-моддасида эса, она ўзининг таъминоти учун оладиган алиментининг энг кам миқдори қонунчиликда белгиланган меҳнатга ҳақ тўлаш энг кам миқдорининг 11,75 фоизидан кам бўлмаслиги лозимлиги белгиланган.
Ўртадаги ногиронлиги бўлган болани у ўн саккиз ёшга тўлгунига қадар парваришлашни ёки болаликдан I гуруҳ ногиронлиги бўлган болани парваришлашни амалга оширган, ёрдамга муҳтож бўлган собиқ хотин (эр), никоҳдан ажралгунга қадар ёки никоҳдан ажралган пайтдан бошлаб бир йил давомида меҳнатга лаёқатсиз бўлиб қолган ёрдамга муҳтож собиқ хотин (эр), никоҳдан ажралган пайтдан бошлаб беш йил ичида пенсия ёшига етган ёрдамга муҳтож хотин (эр), агар эр-хотин узоқ вақт никоҳда туришган бўлса, суд тартибида алимент талаб қилиш ҳуқуқига эгадир.
Никоҳдан ажралгандан кейин собиқ эр ёки хотинга тўланадиган алимент миқдори ва уни тўлаш тартиби собиқ эр-хотин ўртасидаги келишув билан белгиланиши мумкин.