— Президентимиз Мурожаатномада тураржойга эҳтиёжи бор ва ёш оилалар учун “Менинг биринчи уйим” дастури ишга тушиши ҳақида айтганди. Айни дастур бўйича ишлар бошландими? Қайси ҳудудларда арзон уйлар қурилади?
Яраш РАҲМОНОВ,
Жондор туманидаги
“Ибн Сино” маҳалласи раиси.
Саидносир УСМОНОВ,
Қурилиш ва уй-жой коммунал хўжалиги вазирлиги матбуот хизмати раҳбари:
— Дастур бўйича ҳали бирорта ҳудудда ишлар бошланмади. Бироқ жамоатчилик муҳокамаси учун жойлаштирилган “Менинг биринчи уйим” дастурини амалга ошириш чора-тадбирлари тўғрисида”ги Президент қарорига асосан, “Менинг биринчи уйим” дастурининг биринчи босқичи тажриба-синов тариқасида Зангиота туманидаги “Туркистон” маҳалласида бошланиши белгиланяпти. Дастур доирасида амалга ошириладиган қурилиш ишларини мувофиқлаштириш учун “Менинг биринчи уйим” дастурини амалга ошириш дирекцияси ташкил этилади.
Қуриладиган уй-жойлар аҳолига имтиёзли ва бозор шартларда реализация қилинади. Хусусан, имтиёзли уй-жойлар охирги 5 йил давомида мулк ҳуқуқи асосида уй-жойга эга бўлмаган оилаларга, 15 фоиз миқдорда бошланғич тўлов асосида 20 йил муддатга бўлиб-бўлиб тўлаш шартларида ажратилади.
Уй-жой шароитларини яхшилашга муҳтож бўлган шахсларга имтиёзли уй-жойлар бўйича бошланғич тўловининг бир қисмини қоплаш учун – қатъий белгиланган 32 миллион сўм миқдорида, ойлик тўловларининг бир қисмини қоплаш учун – беш йил давомида ҳар ойлик қатъий белгиланган 1 миллион сўм миқдорида субсидиялар берилади.
Қарор лойиҳасига кўра, Дастурнинг амалга оширилишида Туркия Республикаси давлат уй-жой бошқармаси (TOKI) билан ҳамкорлик қилиинади. TOKI Туркияда кам ва ўрта даромадли оилалар учун ижтимоий уйлар қуриш бўйича катта тажрибага эга. Шу билан бирга, кўп квартирали уй-жойлар, йўл-транспорт, муҳандислик-коммуникация ҳамда ижтимоий инфратузилма объектларини лойиҳалаштириш ва қуриш ишларини амалга оширадиган тадбиркорлик субъектлари тендер савдолари асосида аниқланади.
Эслатиб ўтамиз, 2023 йил 5 апрель санасида Президент раислигида бўлиб ўтган видеоселектор йиғилишида Тошкент вилоятининг Зангиота туманида 36 гектарлик майдонда “Менинг биринчи уйим” дастури амалга оширилиши қайд этилганди. Дастур доирасида 2,5 мингта оила учун 58 та кўп қаватли уй қурилади. Ушбу уйлардаги 2 ва 3 хонали хонадонлар учун ойлик тўлов миқдори амалдаги субсидияли ипотека тўловларидан арзон бўлиши айтилганди.