Маҳаллани ривожлантириш, аҳоли фаровонлигини таъминлаш, фуқаролар мурожаатларига ечим топиш, албатта, асосий вазифамиз.
Маҳалла раислари ва ходимлари аҳолидан солиқ тушумларини йиғишда солиқ органларига кўмаклашиш баробарида уларга ҳар томонлама ёрдамлашиб келаётгани рост. Сабаби, солиқ органларига ҳудудлардаги аҳоли вакилларининг айни дамдаги ҳолатини ва солиқ тушумларини тўлашга қурби етиш-етмаслигини маҳалла ходимлари яхши билишади. Аммо бу жараёнда маҳалла ходимларига солиқ йиғимларидан 10 фоиз миқдорда пул ажратилиши керак эди. Лекин ҳали ходимларимизга бу маблағ ажратилмаган, маҳалла бюджетига ҳам тушириб берилмаган. Айтилган гаплар айтилганича қолиб кетди. Қачон туширилиши эса ҳали ҳам бизга қоронғу.
Таклифим шуки, маҳалла ходимларига солиқ йиғимларидан ажратиладиган пул маблағлари маҳалла бюджетига тушириб берилиши керак. Сабаби, маҳаллаларда кам таъминланган, моддий кўмакка муҳтож, ногиронлиги бўлган ва ижтимоий дафтарлардан ёрдам ололмайдиган аҳоли вакилларига шу маблағ ҳисобидан ёрдам бериларди. Маҳаллаларда ҳеч бир дафтарга киритилмаган, аммо эҳтиёжманд оилалар мавжуд. Уларга ўша солиқ йиғимларидан ажратиладиган маблағлардан ёрдам кўрсатиларди. Қолаверса, маҳалла марказларини таъмирлаш ёки уларнинг моддий-техник базасини янгилашга ҳам ўша маблағлар ишлатилса, маҳалла бюджети шаклланиб, фуқаролар йиғини ўзини ўзи таъминлашга ўтармиди…
Шу билан бирга, маҳалла ҳудудида боғ ташкил қилиш ниятимиз бор. У ерга мевали дарахт кўчатларини ўтқазиб, унга масъул этиб маҳалладаги моддий таъминотга муҳтож, кам таъминланган оилаларнинг икки нафар фарзандини бириктирардик. Уларга ойлик иш ҳақини ҳам маҳалла бюджетидаги маблағдан ажратардик.
Ҳаким СУЛТОНОВ,
Бўка туманидаги
«Кулдирок» маҳалласи раиси.